قناع التدريب هل أنت في حاجة له

انتشر استخدام القناع أثناء التمرين لاعتقاد البعض بأن القناع راح يساعد في زيادة اللياقة والقدرة على التحمل وبعد استخدامي له وعمل عمل بعض الأبحاث اكتشف بان القناع ما يعطي الغرض منه. فكرة القناع شبيهة بالتدريب في أماكن عالية مثل الجبال واللي تقل فيها نسبة الأكسجين وتصعب التنفس وبالتالي تحتاج الى التنفس بشكل أقوى واللي راح يفتح الشرايين وتزيد كريات الدم الحمراء وتكبر الرئة حتى تتعود على الوضع في الجبل خصوصا اذا كان فترة التدريب هناك اكثر من أسبوع ولكن اول ما يرجع الشخص من الجبل ويتعود على الوضع تحت راح يرجع جسمه للوضع الطبيعي اللي كان عليه. القناع يفترض ان يشابه هذه الفكرة لكن لان الاستخدام له ما تزيد عن عشرين او ثلاثين ثانية في التمرين فالجسم ماراح يتعود على واللي راح يحصل فقط ان التمرين راح يكون أصعب حتى لو تستمر لفترة طويلة في استخدامه. طبعا هالشي ما يمنع من استخدامه اذا تبي تمرينك يكون اصعب لكن لا تتوقع شي على المدى البعيد. اذا تحب شي مشابه ولكن ما يكتم النفس تقدر تستخدم واقي الأسنان الخاص لممارسي الفنون القتالية. في النهاية تقدر تسوي بحثك الخاص اذا تحب تعرف عنه اكثر.